ihaŋble

Prince Anáȟmeya Kakíže: Tȟéhaŋ Íčat’a Ikpázo uŋ Wayázaŋkiŋ na Úŋksuyapšni Waš’áka uŋ Aphíič’iye Wačhíŋ kiŋ hé Tȟakȟólaku kiŋ Oyákapi

 

“People” Wówaŋyaŋke Wówapi etáŋhaŋ

Vinny Alessi-Narr é na Peter Hill lé yuíyeskapi

Pȟeží Tȟó Wí iwíkčemna núŋpa sáŋm šákpe

 

Prince ečíyapi kiŋ hé – lowáŋ wičháša na wayúhotȟuŋ wóphike k’uŋ hé – wičhóni ékignake kiŋ uŋ makȟásitomniyaŋ wičháčheye s’eléčheča. Na ičhúŋhaŋ tóna kiníhaŋpi kiŋ okáȟniȟ wačhíŋpi; tóškhe wičháša waŋ líla blihéčakiŋ na napȟéčešniyaŋ úŋ čha uŋgnáhelaka t’á iyéye kiŋ hé.

 

Maǧáksiča Aglí Wí aŋpétu iwíkčemna núŋpa sáŋm waŋží uŋ héhaŋ wanáǧiye, na waníyetu wikčémna záptaŋ sáŋm šakówiŋ henákeča. Táku uŋ t’é kiŋ naháŋȟči yuátȟaŋiŋpi šni.

 

Tȟa-wákhiya wičháša waŋ L. Londell McMillan ečíyapi kiŋ hé kitáŋyaŋ leyé, “Prince pȟežúta šíča waŋžíni ȟčiŋ khičháŋye šni.” Heyé k’éyaš húŋȟ čhažéwanilya uŋkókiyakapi na eháŋni Prince úŋksuyapšni waš’áka waŋ ayáič’iya tkȟá kéyapi.

 

Tȟaŋčháŋ ahókipȟa úŋ na pȟežúta šíča él napé áye šni s’eléčheča škȟá waníyetu óta heháŋyaŋ khitȟála íčat’a ikpázo (iyótaŋš siyéte háŋska úŋ) na uŋ líla iglúsotiŋ na tȟaŋčháŋ kiŋ ókowaŋžila stáka škhé. Čha hé uŋ úŋksuyapšni waš’áka hená ayé séče. Tuwá oyákiŋ na “Waníyetu wikčémna núŋpa wahéhaŋyaŋ akáŋl’ikpazopi él táku waŋkálkatuya etáŋhaŋ gliyópsiče s’a, na ečhél niséhu glušíčiŋ na líla yazáŋ kéye.

 

Pȟátapi na wóyazaŋ uŋ hé akísniyapi okíhipi tkȟá Prince Jehovah’s Witness ewíčhakiyapi kiŋ hená ópȟa, na hená tuwá tȟókeča etáŋhaŋ wé ičúpi okíhipi šni wičálapi. Héčha uŋ uŋgnáš ikčéya wičhápȟatapi séče éyaš wókȟokipȟekiŋ na oškíške.

 

Héčhetu k’éyaš úŋksuyapšni khičháŋyaŋ kéya-haŋpi kiŋ hé óta iyúš’iŋyayapi, ičhíŋ Jehovah’s Witnesses hená eyášna pȟežúta šíča iȟéyab ečhúŋpi na mniwákȟaŋ kiŋ enágnala yatkáŋpi.

 

Kičhí wačhékiye í waŋ James Lundstrom ečíyapi čha Prince okíčiyakiŋ na heyé, “Kȟolá tóhaŋni mnipíǧa yatké šni, na nakúŋ mnišá čokčónala yatké, watóhaŋl šna.” Lundstrom kičhí St. Louis Park Kingdom Hall wačhékiya okȟólakičhiye él ópȟa.

 

Minneapolis ikhíyela thitȟáŋka tȟáwa kiŋ él thiwáŋkata iwátȟokšu ogná t’á nuŋs’é ȟpáya iyéyapi kiŋ íyohakab wáŋčačhaŋ yuŋkȟáŋ wabléčapi na wičhát’a-iwáŋyaŋka wičhóȟ’aŋ waŋ ečhákičuŋpi. Wašíču wakȟáŋ kiŋ átaš úŋtȟuŋ šni naíŋš ópi šni kéye éyaš nakúŋ wé kiŋ kȟó iwáŋyaŋkapi kte héčha, na hé okó tóna heháŋyaŋ wóečhuŋ kéye.

 

Tuwáwaka íŋš-eyá čhažéwanilya aóyakapi yuŋkȟáŋ Prince owátohaŋyaŋ wičhókhuže sutá waŋ ičákiža kéyapi. Na makhíyačhiŋkešni t’é šni okó waŋží itȟókab tȟa-kíŋyekhiyapi kiŋ wónihiŋčiye uŋ Moline, Illinois él makȟáta khíyotake, ičhíŋ uŋgnáhelaka yuŋkáhaŋ kéyapi. Na heháŋl okhúže thípi ektá čhaŋčháŋ s’e aípi na waákisniye kiŋ pȟežúta uŋ čhapȟá iyéyapi kéyapi, nikhíyapi kta čha.

 

Tuwá heyé, “Tȟakȟólaku kiŋ líla iníhiŋčiyapi, iyótaŋš zaní šni s’eléčheča kiŋ uŋ, na otóhaŋyaŋ wóaphiye waŋ ečhákičuŋpi na uŋ tȟaŋčháŋ kiŋ húŋkešni na naíč’ižiŋ okíhi šni kéyapi,” eyé.

Moline él čhapȟápi na yukínipi ohákab oápȟe yámnila yuŋkȟáŋ kiŋyáŋ iyáye, Maǧáksiča Aglí Wí aŋpétu iákezaptaŋ uŋ héhaŋ. Na tȟa-wókičiyake kiŋ okíčiyakiŋ na Prince íŋše kȟowákataŋhaŋ wičhókhuže kičhí kičhíza kéye. Áwičakȟeya khušyá úŋ k’éyaš Prince tókȟa yuŋká iyágleya blihéčake. Íaŋpetu eháŋl Paisley Park ektá kičhíčhopi waŋ él lowáŋ ikpázo na áta ȟmúŋ s’e ikík’opi. Yuŋkȟáŋ heyá owíčhakiyake, “Otúyačhiŋ wačhémiyečičhiyapi šni haŋní tȟóéyaš tónačhaŋ heháŋyaŋ apȟé po,” eyá kéyapi.

 

 

www.people.com/article/prince-took-percocet-pain-performing