ihaŋble

Lakȟól Wičhóȟ’aŋ: Wóitȟaŋčhaŋ III

 

Wóitȟaŋčhaŋ: Ikčé wičháša tókhel wóitȟaŋčhaŋ wičhák’upi čháŋna wówahokuŋkhiye kiŋ toháŋl tuwé waŋ itȟáŋčhaŋ kaȟníǧapi čháŋna oyáte tȟáwa kta čha kaȟníǧapi čháŋna hé léčhel wóopȟe kíčaǧapi.

 

Okášpe Yámni: Tuwá ozúya itȟaŋčhaŋ čhaŋ hé blotáhuŋka

 

Tuwá zuyá itȟáŋčhaŋ kte kiŋ hé waná taŋyáŋ iyúkčaŋ yuštáŋ čháŋna wóhiŋ na tóna wičháčhiŋ kiŋ hená wičhákičho, na aŋpétu waŋ él kaȟníǧe. Na waná tóna iyówiŋyaŋpi čháŋna hená ób aŋpétu waŋ kaȟníǧe k’uŋ hé él iyáyapi na wičhóthi kiŋ ikhíyela éyuŋke. Na heháŋl húŋȟ él úpi čhíŋpi kiŋ hená él úpi na ówičhapȟapi. Na waná iyáyapi.

 

Na toháŋl tȟóka kiŋ waŋwíčhayaŋkapi čháŋna hél zuyá itȟáŋčhaŋ k’uŋ hé tókȟel ečhúŋpi yuŋkȟáŋ waúŋtȟuŋyaŋpi na išná wasáŋničayapi kta héči hé uŋ ečhúŋpi. Na waná toháŋl okíčhize čháŋna hél zuyá itȟáŋčhaŋ kiŋ líla waktápi, naphíŋ naíŋš naphíŋ kte šni, henáos. Na waná toháŋl zuyá itȟáŋčhaŋ k’uŋ hé theȟíya khuwápi čháŋna heháŋl tȟa-hókšila kiŋ ókiyapi na wanápȟekičičhiyapi. Na tóna wičháyuha zuyá í k’uŋ oyás’iŋ taŋyáŋ ób glí čhíŋpi uŋ héčhel ečhúŋpi. Na zuyá itȟáŋčhaŋ kiŋ waŋží toháŋl tȟózuye kiŋ húŋȟ iȟpéya wičhágli čhaŋ oyáte kiŋ líla aíyapi čha wótheȟi akhípȟapi, na wíštečapi, čhaŋlwáŋkȟapi hé uŋ.