“Šúŋka Bloká” Okíčhize Mázaǧaǧeča Mahél Khiglé

Brandon Ecoffey lé owá

Maǧáksiča Aglí Wí Iákešakowiŋ, 2016

WAZÍ AHÁŊHAŊ—David “Šúŋka Bloká” Michaud waná waníyetu waŋží Oštéšteya Kičhízapi (wašíčuiya “MMA”) iȟéyab úŋ, éyaš waná akhé él škáŋ kta iglúwiŋyeya-he.

Hékta Oštéšteya Kičhízapi Akíčhiyapi Tȟáŋkaȟče k’uŋ héhaŋ wáŋčala ohíyiŋ na núŋpa akhígle ktépila, na hé íyohakab íȟaŋhaŋ enákiye. Yuŋkȟáŋ lé wí kiŋ Íŋyaŋ Okábleča Otȟúŋwahe héčhiya akhé wičhákhiziŋ kte.

Michaud heyé, “Leháŋl yuphíye ȟčiŋ waúŋ. Waná ómakȟa waŋží heháŋyaŋ mitȟá hokšíla ób imígluthiŋ na akhé wičháwakhiziŋ kte ȟčiŋ yeló,” eyé.

Ékignake šni haŋní, kap’óželapi okášpe naíŋš kap’óžela íyokhihe él šna ópȟa. Tȟoká MMA él tuwá khíze uŋ héhaŋ, Pȟečhókaŋ Háŋska wičháša waŋ Jingliang Li kičhí kičhíze. Héhaŋ obló-šaglóǧaŋ él ohítiya škáŋ na yuphíya khikšáŋ. Ohíya tkȟá éyaš ehákal’éš wayásu kiŋ ktépila kéyapi. Íyokhiheya Garrett Whitely ečíyapi waŋ kičhí hepá na owášagye, na agná wówayuphike lečhákčhala kpazó.

Heháŋl Olivier Aubin-Mercier ečíyapi waŋ kičhí ečhúŋ éyaš kȟapȟá okíhi šni. Heháŋtu čha owátohaŋyaŋ enákiyiŋ kta gluštáŋ. Yuŋkȟáŋ heháŋtaŋhaŋ iglútȟeča kéyiŋ na okíčhize mázaǧaǧeča mahél gle-kíniča kéye.

Leyé, “Tókheškhe wičháwakhiza tkȟá k’uŋ kiksúyemič’iyiŋ na hená ikíkču wačháŋmi. Khitȟátȟala étȟawičhawakpiŋ na kaštág iȟpéwičhawayiŋ na oȟ’áŋkȟoya waktéla čháŋna šna ečhél imíčiyaye,” eyé.

Michaud wayáwa k’uŋ héhaŋ kičhíkšaŋpi él ópȟa na iháŋkeya wóphike, éyaš nakúŋ Oštéšteya Kičhízapi ópȟa kiŋ leháŋyaŋ nážiŋ kičhízapi kȟó uŋspéič’ičhiyiŋ na hé kȟo wayúphika áye.

Tóna MMA él ópȟapi kiŋ hená líglila šna tȟaŋglúškehaŋpi na waš’ág’ič’iyapi, héčhel óhiŋniyaŋ okíčhize waŋží él ópȟapi kta wíŋyeya úŋpi. Éyaš akhé héčhel íčat’a ič’íčhuwapi kiŋ uŋ óta ižéhaŋ úŋtȟuŋič’iyapi. Hékta waníyetu k’uŋ héhaŋ Michaud tuwá kičhí iíglutȟa-ke s’e kičhíziŋ na ečhél ksúyeič’iye, čha otóhaŋyaŋ asníkiye šípi.

Heyá ogláke, “Tȟahékapšuŋ Wí uŋ héhaŋ tuwá wakhíziŋ kta škȟá itȟókab nasúla iwóweto čha wí waŋží heháŋyaŋ átaš tȟaŋwágluškehaŋ owákihi šni naíŋš tókheni škíŋmičiye šni. Hé uŋ kȟáŋmat’e éyaš imáwašte, ičhíŋ asníwakiye uŋ tȟaŋčháŋ kiŋ waglútȟeča na wóbliheča iwékču s’eléčheča,” eyé.

“Ošúŋgye mič’íčhuwa uŋ hé átaš imáwašte šni, na eháš ȟ’úŋt’emič’iye ló,” eyé.

Hó čha Pȟeží Tȟó Wí aŋpétu iákezaptaŋ kiŋháŋ Íŋyaŋ Okábleča Otȟúŋwahe ektá (RFA 57 él) Chris Hall itóheyiŋ kte. Kȟaŋsú 

opȟéyatȟuŋ yačhíŋ háŋtaŋš, lél yá yo: www.cagetix.com/#step3scroll.

Lakȟóta Makȟóčhe Wótȟaŋiŋ Wówapi lé uŋúŋkhiyapi

www.lakotacountrytimes.com/news/2016-03-17/Sports/Bull_Dawg_steps_back_in_the_cage.html