Aŋpétu Iyóhila Mičhíŋča kiŋ Pȟehíŋ Aphíwičhawaye

Christina Johnston lé owá

Ištáwičháyazaŋ Wí Ičítopa, 2019

Aŋpétu iyóhila mičhíŋča núm wičháwatȟuŋ kiŋ pȟehíŋ aphíwičhawaye. Eháŋni, imígluš’ake uŋ héhaŋ owáglakiŋ kte. Aŋpétu waŋ él, Iná na Uŋčíši heyá omákiyakapi: pȟehíŋ kiŋ Lakȟóta kiŋháŋ wakȟáŋkilapi, ičhíŋ naǧípi etáŋhaŋ hiyú škhé. Čha toháŋl pȟehíŋ aphíwičhawaya čháŋna hé weksuye. Eháŋni Lakȟóta kiŋháŋ pȟehíŋ ahókipȟapi na šna kisúŋpi s’a kéyapi. Ómakȟa ópta Mičhíŋča kiŋ pȟehíŋ aphíwičhawaya čhaŋ, wówaglakiŋ na ečhúŋhaŋ anáǧoptaŋ yaŋkápi. Wíčhówoyake oyákapi s’a naiŋš wówiyuŋǧe eyá káǧapi. Pȟehíŋ kiŋ iyótaŋkilapi čha tókhel waštékilapi kiŋ héčheȟčiŋ wičháwečaǧe háŋtaŋš ečéla iyókphipi. Aŋpétu iyóhila owíčhawakiyake:“Taŋyaŋ yanípi na iyónikiphipi kta čha léčhamuŋ nahaŋ thečhíȟilapi kštó.”