Antonin Scalia T’íŋ na Waná Tȟóakaŋke kiŋ Akhíničapi


Čhaŋnápȟopa Wí iwíkčemna núŋpa sáŋm šákpe, 2016

Peter Hill lé owá

TȞUŊKÁŠILA OTHÍ — Čhaŋnápȟopa Wí iákeyamni k’uŋ héhaŋ, wičháša waŋ Tȟuŋkášilayapi Owáyasu Waŋkátuya él yaŋká čha, Antonin Scalia ečíyapi yuŋkȟáŋ hé é čha t’é. Texas makȟópašpe él wakhúwa wóasnikiya waŋ ečhúŋ yuŋkȟáŋ ȟtayétu ečhíyataŋhaŋ tȟakȟólaku kiŋ owíčhakiyakiŋ na ophí-šni kéyiŋ na ečháni iyúŋkiŋ kta kéye. Haŋwátohaŋl t’íŋ na íhiŋhaŋni háŋl tuwá héčhel iyéye. Waníyetu wikčémna šakówiŋ sáŋm napčíyuŋka níuŋ.

Tȟuŋkášilayapi Owáyasu Waŋkátuya él eyášna tuwá napčíyuŋka yaŋkápi éyaš Scalia iȟpéya iwíčhayaye kiŋ uŋ waná šaglóǧaŋpila. Hó čha Tȟuŋkášilayapi – Obama – kiŋ é čha lečhála waŋží kaȟníǧiŋ kte kiŋ tȟawówaši kiŋ héčha. Tkȟá, tȟuŋkášilayapi tȟómničiye él yaŋkápi kiŋ óta (iyótaŋš Phuté Wókič’u Okȟólakičhiye él ópȟapi hená) khušéya inážiŋpi kta kéyapi, tuwé Obama kaȟníǧe k’éyaš. Éeye toháŋyaŋ Tȟuŋkášilayapi tȟéča waŋží kaȟníǧapi šni heháŋyaŋ apȟépi kta awáčhiŋpi.

Léčhel wičhóškaŋ kiŋ uŋ Šúŋšuŋla Okȟólakičhiye kiŋ líla wičháyašičapi, na iyé Obama kičhíčaič’iyapi kta kéyapi. Líla ečháni tuwá kaȟníǧiŋ na él yaŋkékhiye kiŋ wašté kta kéyapi. Hó čha waná wóakhiniče waŋ yaŋké. Naháŋ Waníyetu Wí kiŋ akhé Míla Háŋska oyáte kiŋ čhažé iyóȟpeyapi kte kiŋ lé él líla wayútȟokeča kte séče ló.


"Lakȟól wičhóȟ’aŋ uŋ Lakȟóta wakȟáŋyeža na théča na thiwáhe kiŋ wíyokihiwičhúŋyaŋpi na héčhel wičhóthi ečhékčhe oyáte kiŋ wičhózani na wówaš’ake yuhá mánipi kte, na Lakȟól oúŋyaŋpi na Lakȟól wóčhekiye na Lakȟól’iyápi kiŋ slolkíyapi kte."

 

Matthew Rama: mrama@thundervalley.org,

Peter Hill: peter@thundervalley.org

Cherella Hughes: cherella@thundervalley.org